MIDSUND: Hofseth Biocare vil utvide i Midsund, og har bedd kommunen om å sprenge ut og planere tomt for å legge til rette for dette.
Politikarane i kommunestyret uttrykte glede over at bedrifta vil satse vidare i Midsund, og vedtok torsdag kveld samrøystes å gå inn for tilrådinga frå rådmann og formannskap. Bedrifta har 38 tilsette i Midsund, og politikarane reknar med at utviding vil bety enda fleire arbeidsplassar.
Hofseth vil utvide i Midsund
Område på fire dekar
Det aktuelle området ved bedrifta i Stormyra industriområde er på 4 dekar, og arbeidet med å ordne tomta er kostnadsrekna til 4,5 millionar kroner. Kommunen legg til grunn at tiltaket skal finansierast med låneopptak, og bruk av momskompensasjon. Bedrifta vil betale leige for bruk av området, og rådmannen legg til grunn at leigeinntektene vil tilsvare rente- og avdragsutgifter på investeringa.
Kan bruke masse til halltomt
Rådmann Ketil Ugelvik orienterte torsdag kveld kommunestyret. Han opplyste mellom anna at massen frå utsprenginga er tenkt brukt på halltomta, og eventuelt ved skulen.
– Det er veldig bra at bedrifta ønskjer å utvide her, kommenterte Arnstein Misund (KrF).
– For litt tilbake var det ein del luktproblem, men dette har endra seg. Det er viktig at kommunen legg til rette så bedrifta kan vekse enda meir. Den er stor, og vil forhåpentleg blir den enda større, sa Aslaug Sanden (H).
Hofseth Biocare har forklart kommunen at utbygging på 1200 kvadratmeter skal brukast til å installere tørkeanlegg for proteinkonsentrat. Dette konsentratet vert no frakta frå Midsund til Berkåk, med bruk av betydelege ressursar til transport, og oppvarming og nedkjøling av produktet.
No gir kommunen altså klarsignal for å støtte planen. Arbeidet med utsprenging og planering vert så lagt ut på Doffin i regi av Midsund kommune.