Setter gullstandard  skriv Tidens Krav over 5 spalter på side 2  tysdag 25. oktober. Ei ny fjær i hatten for ortopedimiljøet i Kristiansund. Overskrifta på artikkelen som hyller KIrsti Sevaldsen si doktorgrad i ortopedi og styrking av ortopedimiljøet ved sjukehuset i Kristiansund.— Ho takkar hjelparar, fantastiske vegleiarar og det knallsterke ortopedimiljøet i Kristiansund, som ho no kan verte ein del av, etter å ha fullført forskararbeid og teke si doktorgrad på å ha utvikla ein teknikk, som gjer at ein kan unngå reoperasjonar, etter å ha vore hofteoperert. Disputasen gjekk kjempebra og Kirsti Sevaldsen bestod med glans.

Høgkompetent forsking Øystein Lian fortel i artikkelen, at det er eit forskarmiljø på 12 ortopedar ved sjukehuset i Kristiansund, 5 har alt teke si doktorgrad og 7 er i gang med  sine dokorgradstudier.

Universitetsklinikk. Ein treng ikkje lenger ha eit eige universitet i byen for å få til ei slik ordning. Det er nok å vise til og lære av Ålesund der ein alt har ei slik ordning på plass. Dagens regjeringsprofil der Ola Borten Moe  sit i regjeringsstolen for høgare utdaning, skal vel også vere ein garantist for eit desentralisert utdanningsmønster, også på dette nivået.

Eg siktar då til det omdømet ortopedisk avdeling ved sjukehuset i Kristiansund har i vide krinsar. Ikkje berre her i fylket, men på landsbasis. Ein person som venta på hofteoperasjon fortalte meg at ho hadde valt Kristiansund sjukehus då ho meinte at den beste kirurgiske kompetansen var på dette sjukehuset. Eit slikt omdøme er godt å ha når ein veit at det er fritt sjukehusval og at alle  slik har høve til å velje frå øvste hylle.

Fastlegekrise. Ei rekkje avisoppslag fortel at det er krise, nesten katastrofe med overarbeidde fastlegar som ikkje klarer meir overtid. Dei er utslitne og deira største ønske er å få mindre overtid. Fastlegane har til no fått mykje god hjelp frå utanlandske legar. Dei har vore ei god hjelp for å avhjelpe legemangelen vår. Når vi no får vite at ein må betale opptil kr. 200 000.- i månadsleige for ein fastlege frå eit vikarbyrå, er vi på økonomiske avvegar. Eg har undra meg over at det ikkje vert utdanna nok legar i Norge når vi har lokal ekspertise og får ledige lokaler utan å måtte investere i ny bygningsmasse er det ingen saklege omsyn for ikkje å dra nytte av desse fordelane. Noko anne er det uråd å forstå grunngjevinga for!

Språk og diagnoseutfordringar Dette har sikkert vore ei språkleg utfordring i arbeidet  for dei utanlandske legane. Ikkje berre med å forstå norsk med våre mange dialektar, som gjev høve til feiltolking og feildiagnosar. Desse utfordringane kan ein best løyse ved å utdanne fleire legar her i landet. Noko som ville betre kommunikasjon og skape større forståing mellom lege og pasient. Resultatet vert då at vi får større legekapasitet, reduserte helsekøar og sist men ikkje minst ei betre løysing  for pasientane!

Difor ønskjer eg ordføraren i  Kristiansund  god tur til Oslo for å snakke med sin partikollega, helseministeren. Og sidan han først er i hovudstaden også gjer  avtale med Ola Borten Moe om snarast å få etablert ein universitetsklinikk ved sjukehuset i Kristiansund.

Vil du skrive i På tråden? Send e-post til ordetfritt@r-b.no

Vil du skrive leserinnlegg? Send e-post til ordetfritt@r-b.no

Her finner du meningsstoffet i Nordvest debatt – Rbnetts meningsportal