Noreg er det landet som har flest undersjøiske tunell og fastlandssamband i verden, forståeleg nok. Det har gitt nye og framtidsretta moglegheiter for næringslivet, brukarane, befolkninga, kommunar og regionar. Heile døgnet – heile året.

Det er legitimt å være mot prosjekt, men å respektere og akseptere demokratisk fatta vedtak er limet i vårt styresett. Likevel, og utruleg nok, har tusenvis av personar protestert heftig og lenge gjennom fleire tiår mot fastlandssamband etter fastlandssamband. Trass skremselspropaganda og uriktige påstandar, har prosjekt etter prosjekt likevel blitt realisert til nytte og trivsel etter demokratiske prosessar. Om motstanden mot fastlandssamband er arveleg, av kulturell- eller sosiologisk karakter er vanskeleg å seie.

Likskapen med Jan Eggum’s legendariske sang «På’ an igjen» er i alle høve påfallande. Det har vore «På’ an igjen» mot det eine prosjektet etter det andre. No er det sjølvsagt «På’ an igjen» mot Møreaksen med nye skildringar om armod, elende og alt som vil ramme brukarane. Gjenbruk av påstandar florerer – «unyttig, versting, kostbar, uønskt, feil trasé, og ikkje minst ein veg som ingen vil ha eller treng». Argumenta vert ikkje betre om dei blir sagt mange gonger.

Utruleg nok vert faglege utredningar og politiske vedtak, fortrengt, benekta og avvist av mange – både i avisinnlegg og sosiale media. Det finns vel få om nokon som i dag vil ha attende ferjedrift med nostalgiske sveler, i staden for å kunne nytte eksempelvis Atlanterhavsveien, Krifast, Fannefjordtunellen eller Eiksundsambandet.

Ryfylketunnelen, som vart opna i 2019, er verdas djupaste og lengste undersjøiske vegtunnel. Trafikktal for Ryfylketunnelen i 2020 var langt over forventa prognoser, med omlag 2,5 millionar passeringar. I tillegg har prosjektet fått svært gode tilbakemeldingar frå fornøgde brukarar som har fått tatt del i framsteget.

Fakta om Møreaksen sin status

  • Alle lovpålagte og faglege høyringar, vurderingar og utredningar har blitt gjennomført, med klar anbefaling og konklusjon om at Møreaksen er best for Ferjefri E39 Ålesund-Molde. På same måte er all behandling, prioritering og vedtak blitt fatta i våre demokratiske politiske organ lokalt, regionalt og nasjonalt.

  • Alle prioriteringar og vedtak i Fylkestinget i Møre og Romsdal, regjeringar og Stortinget, har frå 2006 til 2021 alltid støtta og valt Møreaksen som trasé for Ferjefri E39 mellom Ålesund og Molde.

  • Møre og Romsdal fylke prioriterte også Møreaksen i utarbeidd Temaplan: Ferjefri E39 gjennom Møre og Romsdal. Den prioriteringa vart og støtta og ønska av dei aktuelle kommunane i fylket.

  • I Nasjonal Transportplan 2010-2018 vart det igangsett Konseptvalgsutredning (KVU). Konklusjonen var krystallklar. Møreaksen, med arm via Kjerringsundet til Gossen, er beste løysinga.

  • Etter lovpålagt ekstern kvalitetssikring på oppdrag og ansvar frå Samferdselsdepartementet og Finansdepartementet, vart konklusjonen og anbefalinga eintydig. Møreaksen og Kjerringsundet er beste løysinga.

  • I 2014 vedtok regjeringa, med samferdselsminister Ketil Solvik-Olsen i spissen, Møreaksen som trasé over Romsdalsfjorden.

  • I 2016 vart reguleringsplanar for Møreaksen (Vik- Julbøen) behandla og vedtatt.

  • I 2016 sendte tolv ordførar på vegne av sine kommunar frå Herøy i sør til Molde i nord, brev til Samferdselsministeren og departementet med eit krystallklart bodskap : «Vi krev Møreaksen inn i Nasjonal transportplan».

  • E39 Ålesund- Molde (Møreaksen) vart i 2017 eit prioritert prosjekt i Nasjonal transportplan i Stortinget – med brei politisk støtte frå Sp, KrF, V, H, Ap og FrP.

  • Under handsaminga av Nasjonal transportplan 2022-2033 i juni 2021 prioriterte og støtta heile 83 prosent av Stortingets medlemmer E39 Ålesund -Molde (Møreaksen). Det vart også fremma tre konkrete forslag i Stortinget om å «skrote» Møreaksen. Forslaga fekk frå to til femten røyster i stortingssalen, og fall mot eit overveldande stort fleirtal.

  • Samferdselsdepartementet har nettopp gått gjennom den ønska tilleggsutgreiing. Departementet og samferdselsministeren både anbefaler og konkluderer med at Møreaksen som eit prioritert prosjekt i Nasjonal transportplan, er best

Eg ser fram til rask anleggsstart for den kortaste og mest framtidsretta traséen mellom Ålesund og Molde, og som samstundes gjev fastlandssamband for ca. 5.000 personar på Romsdalskysten!    Bernhard Riksfjord

Vil du skrive i På tråden? Legg inn ditt korte innlegg her!

Vil du skrive leserinnlegg? Skriv inn ditt innlegg her!

Her finner du meningsstoffet i Nordvest debatt – Rbnetts meningsportal