Også Molde bydrift har erfart auke i elbilparkering i byen, og konsekvensane av den.

– Vi har følgt med og registrert, og ser no at det i snitt står 15 elbilar parkert heile dagen på avgiftsbelagde plassar sentralt i Molde. Dei står utan å betale, og rett til etter sentralt vedteke regelverk. For oss betyr det tap av store pengar, 15 plassar utgjer om lag 525.000 kroner tapt i året i inntekter, seier parkeringsleiar Lisbeth Brekstad.

Vanskeleg for butikkane

Ho opplyser at også Molde sentrum og bedriftene dei representerer, har kontakta parkeringsetaten om problem. På grunn av at denne typen parkering har auka i omfang, kjem ikkje vanlege kundar til. Til dømers  er ofte fem-seks plassar ved Strande aust i Storgata brukt som heildagsparkering for elbilar.

Brekstad opplyser at det snart vil bli innført ei ny parkeringsforskrift, og dermed opning for at det kan verte ending på parkeringsreglane.

– Dagens reglar er bestemt av Vegdirektoratet, men når det gjeld elbilar, vert det no opna for at kommunane sjølve kan avgjere om dei vil gi betalingsfritak når det nye regelverket kjem.

Vi kjem til å legge fram ei sak for kommunestyret om dette, truleg i oktober. Nye reglar kan begynne å gjelde frå 1. januar neste år, seier Brekstad.

Vil foreslå endring

Romsdal parkering og Molde bydrift vil komme med forslag om at elbilar enten må betale som andre, eller at langtidsplassane vert gjort om til korttidsplassar. Langtidsplassar kan i så fall bli gjort om frå ni timar til to eller tre timar, opplyser Brekstad.

– Elbilar har vel fått fordelar for å minske utslepp, kan det vere aktuelt med alternative, avgiftsfrie plassar?

– Utslepp er ikkje mitt område, det legg eg meg ikkje borti. Men vi ser på muleg parkeringsalternativ, helst burde vi hatt ein gratis parkeringsplass for elbilar om dei vert betalingspliktige, men litt unna sentrum. Kanskje kunne vi fått til det i Grandfjæra, der er det god plass.

– Kva med parkeringstunnelen?

– Sidan det er bom i tunnelen, er det krav om at alle som står der må betale. Men eit forslag kan vere å ta bort bommen, og bruke andre løysingar for betaling. Da ville det vere muleg med avgiftsfri betaling for elbil der, seier Brekstad.

Ho poengterer at det no vert opp til lokalpolitikarane å ta stilling saka.

– Vi skal legge fram vårt forslag, så er det opp til dei å bestemme, seier Brekstad.