VESTNES: Saka kom opp i formannskapet måndag, der innstillinga frå administrasjonssjefen vart samrøystes vedtatt.

Det er to år sidan Vågstranda Vel søkte om grensejustering slik at grensa mellom Vestnes og Rauma kunne bli flytta frå Hjelvika til Vågstrandstunnelen. Skulle søknaden bli godkjent, betyr det at folketalet i Vestnes vil auke med mellom 400 og 500.

Brukar Vestnes

Bakgrunnen for søknaden er blant anna effekten av Tresfjordbrua, som har gjort reisetida frå Vågstranda til Vestnes sentrum mykje kortare. Handelsmønster, offentlege tenester og jobbpendling er argument som blir brukt i søknaden

Fylkesmannen har ikkje komme med innstilling i saka enno. Grunnen til det er at han ville prioritere arbeidet med kommunar som skal slå seg saman. Søknaden frå Vågstranda Vel blir sett på som grensejustering.

Den 18. mai vedtok Vestnes kommune eit nytt brev frå Fylkesmannen, der han ber om ei fråsegn i saka før det blir jobba vidare med saka.

Vedtaket i Vestnes formannskap var samrøystes, dermed blir behandlinga i kommunestyret den 21. juni ein formalitet.

– Vi har diskutert denne saka også tidlegare, vedtaket i formannskapet er i samsvar med det vi har meint før, seier varaordførar Randi Bergundhaugen (H).

Ulike syn

Ho har ikkje diskutert saka med partifelle og Rauma-ordførar Lars Olav Hustad, men blir neppe forundra om Rauma kommunestyre gjer ei heilt anna vedtak enn det Vestnes kom fram til. Rådmannen i Rauma er då også heilt klar i si innstilling: Vågstranda og Hjelvika må også i framtida halde fram som ein del av Rauma kommune.