MIDSUND: – Vi forventar at entreprenøren som får tilbodet for klargjering av tomta, kjem i gang etter ferien. Vi hentar no inn tilbod frå fleire byggentreprenørar.

Klar neste sommar?

Det seier Jarl Knudsen, fabrikksjef ved Hofseth Biocares ASA anlegg i industriområdet Stormyra i Midsund.

– Om tomta da er byggeklar i januar 2019, kan vi ha nybygget ferdig sommaren 2019, seier Knutsen.

Ordnar tomta

Kommunen har nyleg vedteke å bruke 4,5 millionar kroner på å sprenge ut og planere 4000 kvadratmeter tomt tett ved det eksisterande anlegget. Dette for å legge til rette for utviding etter bedriftas ønske. Kommunen viser til at Hofseth Biocare er ein stor og viktig arbeidsplass, og at bedrifta vidareforedlar marine ressursar i ein kommune der nettopp marin næring er viktig.

Produksjon

Hofseth Biocare i Midsund produserer fiskeolje, kalsium og protein, brukt som kosttilskot for folk og dyr. Råvarene er avskjer etter filetproduksjon frå laks og ørret på Sunnmøre. Til no har delar av produksjonen skjedd på konsernets fabrikk Berkåk i Trøndelag, som har ei stor spesialtørke. Det er dette fordyrande leddet bedrifta vil eliminere.

Kuttar utgifter

– Vi transporterer no årleg om lag 1500 kubikk proteinkonsentrat over 20 mil for behandling i denne tørka. Tørka produkt blir sendt til frå Berkåk til kunde. Råstoffet må med denne logistikken kjølast og varmast fleire gonger, det betyr bruk av store mengder energi. Planen er derfor å bygge tilsvarande tørke i Midsund, og spare kostnader både med energibruk og transport, seier Knudsen.

Spraytørke

Denne typen proteintørke er av type spraytørke, der råstoffet vert spraya inn med høgtrykksdyser og med mykje luftsirkulasjon, og kjem ned som pulver. Prosessen krev plass; takhøgda må vere 15 meter. I skissa for det nye bygget, er det dermed teikna inn eit tårn på fleire etasjar. Den nye spesialtørka kjem i tillegg til to tørker som anlegget allereie har.

Døgnet rundt

Knudsen opplyser at bedrifta no produserer for fullt, med fem skift sju dagar i veka. Bedrifta har no 38 tilsette og like mange årsverk.

– Etterspørselen er god, og vi har god tilgang på råvarer. Og det er bra for anlegget å gå heile tida, seier Knudsen.

– Kor mange nye arbeidsplassar vil satsinga kunne gi?

– Det er vanskeleg å seie, men det vert nok ikkje veldig mange. Sannsynlegvis minst 5, seier Knudsen.

Skal kutte luktproblem

– Ein del har opplevd luktplager frå fabrikken, korleis vert dette når ein no utvidar?

– Dette tek vi veldig på alvor, og har jobba hardt for å få kontroll på. Mellom anna ved å få på plass scrubber-anlegg der all luft frå produksjonen vert pumpa inn i scrubben og reinsa med sjøvatn. Men i juli skal vi bytte ut ei av tørkene her, dette vil gi betre kapasitet. Luktproblema vi har hatt, har kome på grunn av at vi ikkje har klart å ta unna raskt nok, og vi har fått avfall vi har måtte lagre på kjøl. Når vi da skal tippe dette over på bil for å sende til destruksjon, blir det lukt, dessverre. Men med nytt driftsmønster, vil vi unngå opphoping av avfall – luktproblema forsvinn, og vi tener meir pengar.

– Korleis ser du på driftsresultat og framtidsutsikter?

– Det kan eg ikkje kommentere, vi er eit børsnotert selskap, så den slags kan eg ikkje seie noko om, seier Knudsen.

– Men det er jo slik at grepa vi gjer kuttar utgifter og aukar inntekter, så da går det vel rett veg, seier Knudsen.

På veg opp

Av selskapets årsrapport for 2017 går det fram at konsernet hadde brutto driftsinntekter på 118,5 mill. kr i 2017, opp frå 20,2 mill. kr i 2016. Konsernet hadde i 2017 negativt driftsresultat på 11,2 millionar kroner – til samanlikning var tapet på 144,6 millionar i 2016.

Konsernet hadde underskot før skatt på 16,5 millionar kroner i 2017, mot underskot på 147,5 mill. kr året før.