Møre og Romsdal fylkeskommune hadde i 2022 eit driftsresultat på 201,3 millionar kroner, opplyste fylkeskommunedirektør Toril Hovdenak då ho la fram dei førebelse tala for politikarane i fylkesutvalet måndag.

– Det positive driftsresultatet er noko betre enn prognosen som blei lagt fram i desember, som viste eit overskot på 140,2 millionar kroner. Auken på 61,1 millionar kroner skuldast i hovudsak auke i rammetilskot, auka skatteinntekter, reduserte pensjonsutbetalingar og korrigeringar for bundne fond. Totalt fekk Møre og Romsdal fylkeskommune heile 112,8 mill. kroner meir i skatteinntekter og rammetilskot enn budsjettert i 2022, skriv Møre og Romsdal fylkeskommune i ei pressemelding.

Stor gjeld

Sjølv om driftsresultatet for 2022 isolert sett er solid, peikar fylkeskommunedirektøren på fleire faktorar som vil gjere åra framover krevjande:

  • Netto driftsresultat var på 2,8 prosent, men det er lågare enn målet som var på 3,3 prosent. I 2024–2026 blir resultatet vesentleg redusert blant anna grunna auke i renter og avdrag.

  • Samferdsel hadde meirforbruket på 23,8 millionar kroner. Netto mindreforbruk var på 53,3 millionar kroner, dvs. 1,1 prosent.

  • Netto finansutgifter var i 2022 på 415,5 millionar kroner, som er 5,8 prosent av driftsinntektene. Fram til 2026 vil netto finansutgifter ha auka med 308 millionar til om lag 724,5 millionar kroner (10,4 prosent).

  • Lånegjelda var i 2022 på 98 prosent av brutto driftsinntekt. I 2026 vil lånegjelda vere på 138 prosent.

– Det vil bety lite handlingsrom i åra som kjem på grunn av auka renter og avdrag, blir det påpeika.

Skal kutte 100 millionar

Arbeidet med økonomiplanen for 2024–2027 allereie er i gang. I mars skal det vere dialogmøte med avdelingane om moglege tiltak for effektivisering og omstilling.

– Som ein konsekvens av prisstiginga i 2022, eit for høgt driftsnivå og aukande lånegjeld skal fylkeskommunedirektøren og hennar stab sjå på korleis ein kan ta ned drifta med 100 millionar kroner i året i den komande økonomiplanperioden, melder Møre og Romsdal fylkeskommune.

SEIER NEI: Fylkesutvalet er skeptisk til rapporten frå eit ekspertutval om inntektssystemet for fylkeskommunane. Foto: Møre og Romsdal fylkeskommune

Nei til nytt inntektssystem

Fylkesutvalet hadde måndag også oppe saka der eit ekspertutval har levert ein rapport om inntektssystemet for fylkeskommunane. Her kjem Møre og Romsdal dårleg ut. Det er rekna ut at forslaget vil gje Møre og Romsdal fylkeskommunen 187,9 millionar kroner mindre frå staten kvart år.

Fylkesvaraordførar Kristin Sørheim (Sp) har tidlegare åtvara og sagt at dette vil bety kutt i kvar fjerde ferjeavgang på fylkesvegferjene.

Eit samla fylkesutval har no sendt eit høyringssvar der dei går imot ekspertutvalet på seks av tolv punkt.