Innan dei fleste bransjar føregår det endringar i meir miljøvenleg retning. Veldig mykje må bli business for å kunne bli dei løysingane vi treng, og stadig meir av miljøpolitikken må gå ut på å lage riktige rammer for grøn næringsverksemd.

I 2017 kom det som skulle bli motoren i det grøne skiftet. Lov om offentlege anskaffingar blei vedtatt av eit einstemmig Storting. Lova oppfordrar det offentlege til å stille krav til miljø og klima ved kjøp av varer og tenester – i 2021 utgjorde offentlege anskaffingar 620 milliardar kroner, så dette ville monne. I tillegg til at det ville bidra til eit betre miljø og reduksjon i klimagassar, ville det gjere norsk næringsliv meir konkurransedyktig. Offentleg sektor og næringslivet i Norge skulle vise veg for omverda! Men nei; i løpet av dei seks siste åra har grøne produkt og løysingar knapt blitt etterspurt frå industrien og øvrig næringsliv. Noreg har ikkje heilt fått start på motoren i det grøne skiftet. Det må bli lønsamt å levere miljøvenleg. Det hastar, skal vi bidra til å redde kloden frå stadig fleire og større naturkatastrofer.

I MDG har vi ambisjonar om å hente ut effektane for klimaet, og sikre grøne arbeidsplassar i næringslivet. Vi vil arbeide for at næringslivet i Molde oppnår ein god og konkurransedyktig posisjon i den nye sirkulære økonomien. Mykje kan skje lokalt. ROR-Innkjøp lyser no ut stilling som berekraftsrådgjevar, som nettopp skal setje krav i innkjøp av nullutsleppsløysingar og sirkulære løysingar. Då kommunen i fjor etablerte nytt næringsfond for Midsund for å styrke nyskaping, innovasjon og næringsutvikling, fekk vi i MDG med oss dei andre partia på at tiltak som legg til rette for miljøvenleg utvikling, bør prioriterast.

I næringslivet i Molde skjer det veldig mykje spennande. Alt frå biogassanlegg på Bersås, bedrifter som Brunvoll som satsar på grundig berekraftsrapportering og utsleppsreduksjon, økologiske produsentar av lokal kvalitetsmat, til Istad Kraft sine planar for fjordvarmeanlegg.

Mange endringar skjer gjennom ein kombinasjon av teknologiutvikling, politisk satsing og haldningsendring. For å kome vekk frå det meiningslause og miljøskadelege overforbruket i for eksempel klesindustrien, vil MDG blant anna kutte moms på reparasjon, og leggje til rette for gjenbruksbedrifter som KIRPPIS i Hustadvika og andre typer bruktbutikkar. Vi treng eit skifte frå kvantitet til kvalitet, og må heie fram reparatørbedrifter, klesbyttedagar og alle gode tiltak for endring.

I ei verd med klimaendringar og aukande press på naturressursar, vil berekraftig fiskeri og havbruk og eit jordbruk basert på norske ressursar, gje oss trygg og sikker mat no og i framtida. I jordbruksoppgjeret jobbar MDG for auka matsikkerheit og mindre ressursintensivt landbruk – fleire bønder, ikkje større fjøs. Det å nytte lokale beiteressursar, med husdyr som beitar fritt i utmarka, gjev også betre dyrevelferd.

Miljøpolitikk er i stadig større grad næringspolitikk – og her må vi spele på lag: Bedrifter, innbyggjarar, kommune og stat må samarbeide slik at lokalt næringsliv kan skape arbeid, velferd og rettferd utan å øydeleggje klima og natur.

Vil du skrive i På tråden? Send e-post til ordetfritt@r-b.no

Vil du skrive leserinnlegg? Send e-post til ordetfritt@r-b.no

Her finner du meningsstoffet i Nordvest debatt – Rbnetts meningsportal