EIDSVÅG: Med første etappe av oppgraderinga på Nesset omsorgssenter, Nos, klar, er eitt av tre pågåande helsebygg så godt som landa. Enda ei avdeling står ferdig renovert til hausten.

Nos-prosjektet kjem på 70,5 millionar kroner, opplyser teknisk prosjektleiar Anita Marie Meisingset til Romsdals Budstikke.

Storsatsing

I tillegg til Nos-utbygginga kjem nytt helsehus, og utbygging av omsorgsbustader på Holtan, totalt gjeld det investeringar på over 200 millionar kroner. Det største prosjektet er det nye helsehuset ved kommunehuset med ramme på 123 millionar kroner. Utbygging av fire omsorgsbustader på Holtan har ramme på 13 millionar kroner. For dette prosjektet er det lyst ut konkurranse for konsulenthjelp i forbindelse med utarbeide teikningar og funksjonsbeskrivelse, som vert lagt til grunn for entreprenørkonkurranse i haust. Byggestart blir i 2019.

Kartlegg behov

Anne Lise Larsen er tilsett som prosjektleiar for det nye helsehuset, og samarbeider tett med Meisingset.

– Kva er status for framdrift for helsehuset?

– Vi er no i ferd med å avslutte kartleggingsfasen. Overordna skal bygget ha 16 omsorgsbustader, base for heimetenesta, dagaktivitetssenter, legekontor og tannlegekontor, og kanskje ambulansestasjon. Kartlegginga inneber planlegging på detaljnivå, der vi må ha oversikt over praktiske og konkrete behov dei ulike aktørane har, forklarer Larsen.

Praktiske løysingar

Som eksempel nemner ho plan for opplegg for søppelhandtering, og logistikk i bygget.

– Vi ser på kor det kan vere fellessoner, på inngangar og gjennomgang, korleis kan ein eventuelt dele på venterom og teknisk utstyr – slike ting som må vere klar før endeleg planløysing vert fullført, seier Larsen. Planleggarane har kontakt med ei rekke representantar for brukargrupper, i tillegg til aktørane som skal flytte inn.

– Om det er andre som har innspel, er det viktig at dei kjem på banen straks, seier Larsen. Planleggarane legg elles opp til eit innovativt bygg, oppdatert med det siste innan velferdsteknologi.

Utfordring

Grunnforholda på tomta i Eidsvåg sentrum har bydd på utfordringar.

– Det er kvikkleire i grunnen, dette tek vi på det største alvor, seier Larsen. Og viser til at ein må gjere ekstratiltak når det gjeld avløp, leidningar og rør, og i høve til flaumfare.

Usikkert om ambulanse

– Kva med ambulansestasjonen?

– Det er enno ikkje avklart. Det er sagt at det skal planleggast med lokale for ambulanse som ein opsjon, men på eitt tidspunkt må vi vite om det blir, seier Larsen.

– Det vil vere ein fordel å ha ambulanse her, men dette er det opp til helseføretaket å finne ut av, seier Larsen.

Byggestart på nyåret

– Etter ferien går vi i gang med å samanstille behovslistene, og lage skisser. Når dette er klart, får vi inn konsulentar som skal lage funksjonsbeskrivelse. Dette vert grunnlaget når prosjektet vert lagt ut som konkurranse for entreprenørar i løpet av hausten, seier Larsen.

Planen vidare er byggestart på nyåret 2019, etter at endeleg plan har vore innom kommunestyret for klarsignal.

Mellombygg

– Korleis skal bygget sjå ut?

– Det er ikkje avklart, sjølv om det finst arbeidsskisser. Men vi snakkar eit bygg på fleire etasjar, seier Meisingset.

Nybygget skal byggast saman med kommunehuset, og dei to fortel om planen for samanføyingsdelen.

– Vi tenker denne delen av bygget med glasfasade, med fin utsikt ut over fjorden. Vi ser for oss fellesbruk-sone med gjennomgang til dei ulike aktørane, og møteplass open for publikum. Her vert det også plass til å ta i mot besøk for dei som bur her, forklarer Larsen.

Leik og trening

På grøntområdet framfor bygget tenker planleggarane uteareal med leikeplass, og utandørs treningsapparat.

– Målet er å inspirere til aktivitet, seier Larsen.

Utanfor nybygget er det planlagt grøntområde, leik og utandørs treningsapparat, forklarer prosjektleiarar Anne Lise Larsen (t.v.) og Anita Marie Meisingset. Foto: ANITA VINGEN