I vår ga Jan Inge Sørbø, professor ved Høgskolen i Volda, og Det Norske Samlaget ut den første nynorske litteraturhistoria i bokform. Frå 23. august er forteljinga om den nynorske skjønnlitteraturen 1850–2015 fritt tilgjengeleg for alle på Allkunne.no. Det skriv Allkunne i ei pressemelding.
Publiseringa er eit samarbeid mellom Nynorsk kultursentrum, som driv det digitale oppslagsverket Allkunne.no, Det Norske Samlaget og forfattaren Jan Inge Sørbø. På nettstaden blir utdrag frå boka til Sørbø publisert, saman med nyskrivne artiklar om ulike forfattar skrivne av om lag 100 ulike artikkelforfattarar.
– Vi har ønska å feire 150-årsjubileet vårt ved å løfte fram den nynorske litteraturen og lesarane. Derfor har vi ønska å gi det norske folket gratis tilgang til ei forkorta digital utgåve av den nynorske litteraturhistoria. Her får lesarane lære om historia, og bli inspirerte til meir lesing av den mangfaldige nynorske litteraturen, seier direktør Edmund Austigard i Det Norske Samlaget. Den digitale utgåva består av åtte illustrerte periodeartiklar, eit samandrag og tilhøyrande kvissar. I tillegg kjem om lag 900 oppdaterte artiklar om diktarar som har publisert på nynorsk eller dialekt. Prosjektet har blitt mogleg gjennom løyvingar frå Fritt Ord, Kulturdepartementet og Sparebanken Vest, heiter det i meldinga.