Rådmann Ketil Ugelvik legg no fram sak om budsjettendring 2018 for formannskap og kommunestyre. Fleire føresetnader har endra seg, både på pluss- og minussida. Bakteppet for endringsforslaget er udekt underskot frå 2016 på 684.739 kroner, og udekt underskot på 4.117.244 kroner frå 2017.

Betrar budsjettbalansen

I 2018-budsjettet var det lagt inn kr 500.000 som venta midlar frå Havbruksfondet. No viser ny prognose at kommunen får 3.581.088 kroner frå dette fondet. I tillegg kjem lågare minimumsavdrag og nedjustering av behov for barnevernstiltak – i sum blir dette ei endring som betrar budsjettbalansen med 4.881.000 kroner.

Svekker budsjettbalansen

På den andre sida er det også nye punkt som dreg den andre vegen. Rådmannen listar opp auka utgifter med legevaktavtale, nedjustert refusjon for krevjande brukarar, avtale med Midsund idrettslag, forundersøkingar for gangveg over Midsundbrua, inndekking av underskot for 2016, og flytting av innsparingsmål frå administrasjonen til sjukeheimen.

Prioriterte tiltak

Ugelvik poengterer nokre tiltak som viktige å prioritere. Dette gjeld særleg inndekking av underskotet frå 2016, og å få eit klart bilete av omfang og løysing av trafikksikringstiltak for Midsundbrua.

Åtvarar

– Rådmannen er glad for at kommunen no ser ut til å få betydelege midlar frå Havbruksfondet, skriv Ugelvik, men åtvarar likevel mot å tru at det kjem store årlege tilskot.

– Slik ordninga er innretta, må ein vere forsiktig med å forskotere inntekter i framtida.

– Ligg godt an

I saksutgreiinga konkluderer rådmannen med at nettoeffekten av budsjettendringane gjer at ein kan auke disposisjonsfondet med 2.736.000 kroner.

– Ein vil då ligge godt an til å k‑unne dekke inn underskotet frå 2017 i 2018/2019, men ein grunnleggand føresetnad for dette er at ein klarer å halde ein stram budsjettdisiplin gjennom året, seier Ugelvik.

Ingen Robek-angst

At Midsund no hamnar på Robek-lista, ser han ikkje som eit stort problem.

– Dette skal vi handtere. Vi har vore der før, og skal nok klare det no også. Det viktige no er målet om at vi skal ha økonomien i balanse til 1.1. 2020, til samanslåinga med nye Molde kommune. Det ser vi som realistisk, ikkje minst sidan vi har korrigert dei faktorane som gav utslag og underskot i 2017. Så får det våge seg om vi kjem på Robek-lista, det får bli som det blir, seier Ugelvik til Romsdals Budstikke.