Den nye gangvegen skal auke trafikktryggleiken på strekninga, og betre forholda for gåande og syklande mellom Rød og Eidsvåg sentrum.
2,3 kilometer
Kommunestyrets vedtak inneber at Nesset kommune finansierer forskotering av gang- og sykkelveg Jevika – Hargaut – Hammervoll, langs fylkesveg 62, med inntil 75 millionar kroner. Det vil gi ei strekning på cirka 2,3 kilometer gang- og sykkelveg på nordsida av fylkesvegen, med 3,5 meters breidde. Klokkarelva og Høvikelva er planlagt kryssa med gangvegbruer.
Inkludert i prosjektet er utbetring av området ved Lensmannsbrekka. Herfrå er det frå før av 2 kilometer samanhengande gang- og sykkelveg til sentrum.
– Gladsak
Politikarane omtalte forskoteringa som ei gladsak – å få på plass gang- og sykkelveg på den ulykkesbelasta strekinga har i lang tid vore etterlengta. Det vanka også ros til administrasjonen for god saksutgreiing.
– Vi ser no lys i tunnelen for prosjektet, sa ordførar Rolf Jonas Hurlen. Han poengterte at det også ligg inne midlar relatert til kommunesamanslåinga i løysinga. Kommunen har så langt lagt ut 1,8 millionar kroner i plan- og prosjekteringskostnader i 2014–2017.
– Eg er svært glad for at dette no ser ut til å bli ein realitet. Særleg for Rød, som er i vekst, sa Svanhild Kvernberg (KrF).
– Ja, dette er ei gladsak, sa Anders Torvik (Ap), og minna om forhistoria som ulykkesbelasta strekning.
– Blir lagt merke til
Nesset kommune har over tid gjort omfattande forarbeid, og så langt kosta 1,8 millionar kroner i plan- og prosjekteringskostnader i 2014–2017.
– Nesset har brukt mykje midlar på planlegging og klargjering her, det vert lagt merke til, sa Svein Atle Roset (KrF).
Gangvegen er inne på 16.-plass på den fylkeskommunale prioriteringslista; planlagt finansiert over tre år med 5 millionar i 2020, 15 millionar i 2021 og deretter 50 millionar i perioden 2022 og 2027.
I intensjonsavtalen mellom Molde, Midsund og Nesset er bygging av gang- og sykkelvegar Hargaut–Rød omtalt som særleg prioritert.
Må undersøke meir
Undersøkingar som allereie er gjort, viser at det er behov for å supplerande grunnundersøkingar sommaren 2018, for å få eit tilstrekkeleg grunnlag til å lage byggeplan. Rådmannen meiner det er vesentleg å få utarbeida nødvendig grunnlagsdokument, slik at anbodsdokument kan bli kunngjort raskt etter at finansiering er avklart.
Økonomi
Sjølv om midlar på litt sikt dermed vil komme, må Nesset kommune rekne med økonomiske konsekvensar ved å forskotere – det kan bety auka driftskostnader for Nesset.
– Kommunen har ingen frie midlar som kan nyttast til denne finansieringa. Det er usikkert når kommunen kan få refundert forskoteringa, og kva rentesats kommunen får ved opptak av lån. Med lån på 75 millionar kroner og rentesats på 2 prosent, blir det ein årleg kostnad på 1,5 millionar kroner. Fylkeskommunen refunderer ikkje renter på lån. Dette blir ei driftsutgift for kommunen, heiter det i saksutgreiinga.
Det vert også poengtert at kostnader med eventuell prisstigning må dekkast av kommunens drift.
Over til Nye Molde
Kostnadene i dette prosjektet vil ikkje berre berøre dagens kommune, men også nye Molde kommune. Sidan denne gang- og sykkelvegen er inne på fylkeskommunal plan 2020–2027, er det derfor noko uklart når ein eventuell refusjon vil bli effektuert, heiter det i saksutgreiinga.
– Om det går fleire år før kommunen får betalt tilbake forskoteringa, kan det medføre fleire millionar i rentekostnader som må belastast drifta av kommunen, skriv rådmannen.
