– Tomta er ideell for helsehus og omsorgsbustader, poengterer rådmann Anne Grete Klokset, og rår til at det vert sett fart i saka. Kommunestyret behandlar torsdag oppstart av detaljprosjekt for helsehuset, etter at alle utval og aktuelle instansar har sagt ja til prosjektet.

Sjønært og sentralt

Rådmannen peikar i saksutgreiinga på at plasseringa er nær sjøen, med god utsikt og gode solforhold. Tomta er sentrumsnær, så bebuarar i omsorgsbustadane sjølv kan ta daglege gjeremål som handling, og også kan nytte seg av sjøpromenaden.

Innhaldsrikt

Planen er eit nytt, vinkelforma bygg plassert på sør- og austsida av kommunehusets parkeringsplass. Helsehuset skal romme 16 omsorgsbustader, dagsenter, heimeteneste, legesenter og muleg ny ambulansestasjon knytt til legesenter, privat og offentleg tannhelseteneste, og parkeringshus for heimeteneste, vaktmeisterteneste og bebuarar i omsorgsbustadane.

Samlokalisering

Rådmannens vurdering er at ved å samlokalisere fleire helsetenester og omsorgsbustader i eit felles helsehus, vil Nesset kommune kunne gi innbyggarane gode og framtidsretta helsetenester.

– Dette gir kommunen høve til å følgje opp samhandlingsreforma. Vi får også unik sjanse til å kunne yte rett hjelp til rett tid, med helsepersonell med høg kompetanse, seier rådmannen.

123 millionar

Prislappen er sett til 123 millionar kroner. Rådmannen kommenterer at prosjektet vil vere svært kostnadskrevjande, og føreset høge låneopptak.

– Men prosjektet vil kunne få betydelege tilskot frå Husbanken. Dei fleste areala vil vere til utleige, og vil gi leigeinntekter. Samla sett er det venta at bygget skal vere tilnærma sjølvfinansierande over tid, skriv Klokset.

Rådmannen har innarbeida prosjektet i økonomiplanen for 2018-2021, med 2 millionar sett av til gjennomføring av detaljprosjekt i 2018.

Framdrift

For å kunne halde forventa og ønska framdrift, uttrykker rådmannen at det er viktig å få på plass eit vedtak for å kunne komme vidare med prosjektet.

– For å kunne lyse ut anbodskonkurranse for prosjektet, må det funksjonsbeskrivast av rådgivande konsulentar første halvdel av 2018.

Utlysing av anbodskonkurranse skjer deretter så snart råd er, skriv rådmannen.

Klart i 2020?

Ho ser det da som realistisk at oppstart av hovudprosjektet vil kunne vere aktuelt ved årsskiftet 2018/ 2019.

– Ferdigstilling kan i så fall vere muleg i løpet av 2020, skriv rådmannen.