MOLDE: I sommar dukka det opp nye klopper på stien mellom Varden og Skihytta. Det er Svein Roger Ivarsen som står bak, i eit prosjekt utført i dialog med kommune og Friluftsråd.
– Eg har brukt Moldemarka ivrig sidan eg var barn, og set som mange andre stor pris på den. Eg har sett bruken – og også slitasjen – auke sterkt dei siste åra. Eg ønska derfor å lage noko som kunne beskytte terrenget, særleg der det er myr, seier Ivarsen.
Spesielt tilpassa
Ideen var dermed å lage klopper som er sterke og velfungerande, som er tilpassa og vernar terrenget, som er miljøvennlege og estetiske. Slike klopper var ikkje å finne, så Ivarsen bestemte seg for å lage dei sjølv – i garasjen heime.
Kjerneved
Etter ein del utprøving vart resultatet kloppene som no er på plass. Det er fem delar som er montert saman, alle i kjerneved-material av furu.
– Eg ville unngå impregnerte materialar som inneheld gift. Kjerneved er sterk, den inneheld harpiks som beskyttar mot mellom anna ròtesopp, seier Ivarsen, og viser til tradisjonell byggeskikk brukt i stavkyrkjer og gamle hus.
Over bakken
Føresetnaden er likevel at materialane kan tørke opp innimellom. Kloppene kviler derfor punktvis på steinheller, og held 10–20 cm over bakken.
– Dette ser ut for å fungere fint både for kloppene og bakken under, seier Ivarsen.
Over tid vil fargen på det ubehandla treverket endre seg.
– Den lyse fargen dei har no som nye, vil dempe seg. Så i løpet av eit par år vil dei nok vere grå, poengterer Ivarsen.
Kanskje fleire
Ivarsen er no i gang med å kartlegge situasjonen langs stien mellom Varden og Skihytta, som del av eit større prosjekt i regi av kommunen. Målet er å verne om turterrenget – dermed kan det kanskje også bli fleire slike klopper.
– Klopper er eitt av fleire verkemiddel. Men dei som bruker marka kan også medverke; hugs at marka er stor! Eg vil oppmode folk om å velje andre og mindre brukte stiar, og slik avlaste terreng som allereie er sterkt utsett for slitasje, seier Ivarsen.