RAUDSAND: Miljødirektoratet varslar at ny og endeleg frist for ferdigstilling av Deponi 1 ved Bergmesteren Raudsand AS no vert sett til 1. oktober neste år.
Varslar mulkt
Direktoratet viser til at deponiet etter planen skulle vore ferdig 1. desember 2013, fristen var seinare forlenga til 1. juli 2014.Om den nye fristen ikkje vert halden, varslar direktoratet tvangsmulkt på 1,25 millionar kroner.
Skal dekke farleg avfall
Bakgrunnen for saka er at Deponi 1, som ligg i ein sammenrast gruvestoll, var nytta av Alumox AS (tidlegare Aluvest Raudsand) og Aleris (tidlegare Reox AS) til deponering av saltslagg, filterstøv og skrap. Saltslagget er karakterisert som farleg avfall.
Direktoratet har gitt løyve til at det vert nytta reine og/eller lett forureina masse til å fylle opp deponiet, som så skal avsluttast med tette massar og tilplanting på toppen. Mellom krava til fyllinga er at toppdekket skal byggast opp med tett dekke med gassdrenering, og at eventuell lett forureina massar skal følge gitte krav.
– Miljødirektoratet meiner at vi har vore imøtekommande for å bidra til at Bergmesteren Raudsand AS får gode rammevilkår for deponiets avslutningsfase. No ønskjer vi imidlertid å sikre at deponiet får ein endeleg slutt, heiter det mellom anna i direktoratets brev.
– Har mangla masse
Harald Storvik, dagleg leiar i Bergmesteren Raudsand AS, reknar med at Deponi 1 skal kunne ferdigstillast innan fristen.
– Kvifor har det teke så lang tid å få orden på dette?
– Vi tok over problem andre etterlet seg da vi tok over for fem år sidan, og det har vore ein del fram og tilbake om ting. Det har dessutan vore mangel på masse i marknaden, dermed har det teke tid. Men no løyser det seg, vi får inn rivingsmassar frå Haukeland sjukehus i Bergen, seier Storvik til Romsdals Budstikke.
Knust betong frå Bergen
Han anslår at det er snakk om lag 25.000 tonn knust betong, som skal fraktast med båt til Raudsand. Dette vil vere omtrent det som trengst for å fylle opp deponiet.
– Når vil deponiet vere ferdig?
– Massane frå Bergen kjem over sommaren. Frå før av er det lagt på om lag 20.000 tonn by-gravemasse frå Trondheim. Så gjenstår det å finne massar til toppdekket, leire eller anna som er tett og held vatn unna slik kravet er, seier Storvik.
Han reknar med å unngå tvangsmulkt.
– Den vil vi ikkje ha, nei, seier Storvik.
I tillegg til Deponi 1, søker Bergmesteren Raudsand AS om å etablere deponi for ordinært avfall på Deponi 2, og ønskjer også å etablere mottak av farleg avfall i fjellhallar på området.