Når siste utbygginga på Nyhamna no går mot slutten, tok gossingen Stein Arild Småge ei avgjerd: Etter åtte år på «Ormen» ville han no lage sin eigen arbeidsplass. Torsdag åpna han Bygger’n si nye avdeling på Gossen.

Med seg på lasset har Stein Arild Småge to andre som har blitt ramma av nedbemanningane i olje- og gassbransjen: Jorunn Stavik Varhaugvik, som var vektar på anlegget på Nyhamna, blir no å finne i butikken som kundeveiledar, medan Joachim Hukkelberg ikkje lenger blir å finne offshore, men på lageret til Bygger’n på Falkhytten.

– Eg visste at siste utbygginga gjekk mot slutten, det var vi klar over alle saman på Nyhamna. Eg har vore ved anlegget i åtte år og treivst godt, men no var eg klar for å skifte jobb, fortel Stein Arild Småge. Dermed sa han opp og forlet Nyhamna ved årsskiftet.

Tilsett på rekordtid

Snekkaren vurderte å starte byggefirma, men då det kom han for øyre at Bygger’n ønska å etablere seg på Gossen, tok han kontakt med eigaren E A Smith i Trondheim. Etter få veker var han tilsett som dagleg leiar og 15. februar i år tok han over drifta av lokala på Falkhytten.

Torsdag var det formell åpning av byggvarebutikken, med celebert besøk, kake og snorklipping.

– Eg har fått mange kommentarar på om vi skal konkurrere med andre aktørar i byggebransjen her på øya – det skal vi ikkje. Vi skal utfylle kvarandre og samarbeide. Det den eine ikkje har, kan den andre kanskje ha. Det blir til det beste for kundane – at dei har fleire alternativ, meiner Stein Arild Småge.

Kjenner lokalmiljøet ut og inn

Tre årsverk og fire stillingar gir den nye byggvarebutikken, der også Terje Småge blir å finne på lageret – eit lager med stor kapasitet og som gir kundane tilgang til material umiddelbart.

– Vi kan ha vindu, tak, dører og materialer lagra til kundane vil hente dei eller vil ha dei tilkøyrt. Med dei verforholda vi har her på kysten, kan det vere ein fordel, smiler Småge.

– Vi kjenner lokalmiljøet. Ikkje minst har vi inngåande kunnskap om bygningar, om tilstand og om vind og ver. Den kunnskapen vil utvilsomt komme kundane til nytte. Og vi kan formidle kontakt med lokale handtverkarar.

– Og vi tek oss av små, som store prosjekt, fortel Stein Arild Småge og peikar på ei teikning på veggen:

– Det kom ein vaksen kar inn på kontoret her og ville vi skulle leite fram alt ein trengde for å gjennomføre prosjektet på denne teikninga. Det ordna vi, veit du! Det er ei fuglekasse…