MOLDE: Den regjeringsbestilte rapporten «En mer effektiv og fremtidsrettet hjelpemiddelformidling – for økt deltakelse og mestring» vart måndag presentert på litt alternativt vis.

Formidling av hjelpemiddel

Arbeids- og sosialminister Anniken Hauglie ønska velkommen frå departementet, og gav ordet til utvalsleiar Arild Hervik på Høgskolen i Molde.

Presentasjonen gikk så på Skype, der Hervik presenterte utvalsrapporten for forsamlinga i Oslo.

– Herviks faglege og personlege erfaring viktig Statsråd Anniken Hauglie om Arild Herviks bidrag.

Framtidas utfordringar

Utvalet har vurdert behov for endringar i hjelpemiddelpolitikken for å møte framtidas utfordringar – mellom anna som følgje av fleire eldre. Utvalet har også vurdert ansvarsdeling mellom staten og kommunane på området, og foreslått justeringar av dette. Utvalet tilrår likevel at hovudmodellen ligg fast. Utvalet har også foreslått fleire tiltak for å effektivisere dagens formidling – inkludert å styrke kommunanes kompetanse og kapasitet på området.

Dissens

På nokre punkt har utvalet delt seg i innstillinga.

– Overordna foreslår utvalet vidareføring av den norske modellen, med statleg finansiering og rettar i folketrygda. Brukaren må stå i sentrum, og få rett hjelp til rett tid, seier Hervik.

– Det var også dissens på nokre punkt?

– I hovudsak er utvalet samla, men dette er eit komplekst område, så det er ikkje overraskande at det blei dissens på nokre punkt. Dette gjeld mellom anna i kva grad kommunane skal ha eit større ansvar, særleg når talet på eldre veks.

Krevjande

Hervik blei engasjert som utvalsleiar av dåverande statsråd Roger Eriksson hausten 2015. Han sa den gong at han var glad for å bli spurt, men at han med sin alvorlege muskelsvinnsjukdom måtte sette visse praktiske rammer for arbeidet.

– Da du sette i gang, sa du at du var spent – korleis har det gått?

– Langt betre enn eg hadde frykta. Å vere utvalsleiar er ei krevjande oppgåve, ein må på vegner av utvalet ha ei svært djup forståing av problemstillinga. Arbeidet har også omfatta ein del reising, vi har hatt 10 møte i Oslo. Å skulle sette seg så grundig inn i dette, og samtidig fungere som leiar har vore utfordrande. No er eg stolt over å ha greidd det, seier Hervik.

God hjelp

Og legg til: – Eg er stolt over at vi greidde, det! Utan assistenten min Wenche her ville det ikkje gått. Da eg blei spurt, måtte eg konferere med henne, eg ville berre gå inn i dette om ho ville hjelpe. Da ho sa ja, var det greitt. Utan henne og andre gode hjelparar hadde ikkje dette gått, seier Hervik.

– Er sjøl et eksempel

Dette var Herviks utvalsrapport nummer 18 – for 13 av dei har han vore utvalsleiar.

– Så dette var den siste, gnisten er nok ikkje heilt den same som i 1999, da eg var 50 år og arbeidde med tre utval samtidig, seier Hervik.

Han er no sjølv i stor grad avhengig av hjelpemiddel.

– Kva har dette hatt å bety for arbeidet med rapporten?

– Eg har jo mykje erfaring med hjelpemiddel og er omgitt av dei hele tida, det er ein viktig del av kvardagen. Slik sett er eg eit døme på kva dette handlar om – hjelpemiddel gjer at eg kan meistre og delta aktivt, seier Hervik.