Onsdag vart det feira med marsipankake i kantina i Romsdals Budstikke, pynta med vakker oppgangskurve.
- Samanliknar vi inneverande veke med tilsvarande veke i fjor, ligg vi no på om lag 40 betalande abonnentar over. Det er svært gledeleg, seier ansvarleg redaktør og adm.dir, Ole Bjørner Loe Welde.
Han opplyser at Romsdals Budstikke har vakse jamt i heile år, frå i underkant av 14.000 abonnentar ved inngangen av 2016, medan vi no har knappe 14.200.
RB er no største dagsavis i alle kommunar avisa kjem ut i.
- Veksten kjem på digitale abonnement og på RB Pluss. Vi hadde stor vekst førre veke i samband med sjukehusrettssaka. Vi opplever at det er betalingsvilje for journalistikk, abonnentane forstår at det kostar å lage god journalistikk, seier Loe Welde.
I ei tøff tid med fallande oppslutning for bransjen, er RBs ambisjon no å halde den positive takten framover.
- Vi feirar at kurven snur og peikar rett veg, og har tru på at trenden skal vare, seier Loe Welde. Han viser til den store pågangen av lesarar som førre veke ville ha hjelp med å komme seg i gang som digitale brukarar.
Jan Arvid Gjeldnes, salssjef for lesarmarknad i Romsdals Budstikke, opplyser at svært mange no tek kontakt for å komme i gang med e-avis og ikkje minst å få lese plussaker på Rbnett.
- Mange av dei som tek kontakt, er godt vaksne abonnentar vil oppdatere seg og lese heilt ferske artiklar. Vi har hjelpt til med både oppsetting av digital konto, og også hjelpt folk med nødvendige oppdateringar og elementære dataspørsmål. Det er heilt greitt, folk må gjerne komme innom eller ringe oss. Også med tanke på sommar og ferietid er det fint å ha tilgang til avisa også digitalt, seier Gjeldnes.