Måndag 5. mars blei det klart at Helse Møre og Romsdal har fått ny styreleiar. Ingve Theodorsen (64) har hatt Statoil som arbeidsgivar i mesteparten av sitt yrkesaktive liv, og siste stilling var som teknisk direktør for anlegg til havs, skriv Helse Møre og Romsdal i ei pressemelding.
Dei har fått denne kommentaren frå 64-åringen:
- Eg likar utfordringar, og trur dette blir interessant og lærerikt. Eg ser fram til å starte på oppgåva, og vil bruke tida framover for å sette meg inn i helseføretaket.
I løpet av våren vil han besøke helseføretaket for å bli nærare kjend med organisasjonen.
Som kjend er økonomien i Helse Møre og Romsdal den store utfordringa han no får å bryne seg på.
Styreerfaring
Dei fire siste åra har han også vore styremedlem i føretaksstyret for St.Olavs Hospital, og har også vore styremedlem i Forskingsrådet i tolv år – åtte av dei som styreleiar.
I Helse Møre og Romsdal er alle medlemmane nye med unntak av tilsetterepresentantane, og første styremøte er fredag 16. mars.
