– Kor er sikringsskapet? spør Bratseth-montør Roar Nøsen, på veg inn til Josten Møster på Tiltereidet ved Eidsøra. Det nyrenoverte huset frå 1840 skal oppdaterast med moderne måleutstyr for straumbruk, som alle landets husstandar etter kvart skal få.
Først ut
Nesset og Sunndal er første i vårt område med masseutskifting av nye målarar. Om lag 2.500 husstandar har så langt fått ny målar. Installeringane er gjennomført bygd for bygd, først på Bugge, vidare Eresfjord, Eikesdal og Gussiås, Eidsvåg-området og no området Eidsøra og mot Rausand.
Det er montørselskapet Bratseth AS som byter ut målarane i Nesset. Bratseth-montør Roar Nøsen har jobba i selskapet sidan i haust, og fortel at han så langt har bytta over 200 målarar. Kvart skift tek 15–45 minutt, avhengig av korleis forholda i sikringsskapet er.
Antenne
I går var turen kommen til Møster på Eidsøra. Møster viser veg til sikringsskapet – her i huset var det elektriske anlegget skifta for få år sidan, og er dermed relativt nytt.
Nøsen går til verket utrusta med hodelykt, drill og skrujarn går Nøsen i gang. Han ser over anlegget, sjekkar status på iPaden og gjer klar ny bruker.
Ny måleboks skal på plass i sikringsskapet, og antenne blir montert på utsida av skapet.
– Den nye målaren har antenne, og koplar seg til basestasjon i nærleiken. Dei fleste plassar går dette greitt, men nokre stader må vi bruke simkort, om forholda er vanskelege, opplyser Nøsen.
Mørklegg
Han koplar frå straumen ei økt for å fullføre oppdraget.
– No tek eg straumen, annonserer han, og det vert mørkt. Det durar i vedomnen, og i lyset frå hodelykta kjem den nye målaren på plass, vert forsegla og er i gang.
Startar på 0000000
Med 0000000 på displayet får straumbruk og -administrering hos Møster ein ny start – sjølv om gammal stand er registrert.
– Kjempebra, så slepp ein å drive å passe på dette. Særleg bra for eldre og andre som slit med å følge opp stadige spørsmål om avlesing, seier Møster.
– Få endringar
Han trur derimot ikkje at straumbruken i huset vil bli særleg endra etter å ha fått ny målaren på plass.
– Eg har ikkje følgt så nøye med på det før, og held vel fram som før. Eg fyrer jo med ved, og bruker elles straum til golvvarme, på bad, vaskerom og kjøken, seier Møster.
– Slepp maset
Måleransvarleg hos Nesset Kraft, Willy Rød, opplyser at det foreløpig ikkje er snakk om differensiert pris time for time, men at dette vil komme for dei som kjøper kraft med spotprisavtale.
– Nesset Kraft sel straum berre på fastprisavtale. I første omgang blir endringa at folk slepp maset med å måle, og at avrekning og fakturering vert helt nøyaktig, seier Rød.
– Det vert ein lette både for kunden og for oss, meir effektivt og korrekt, seier Rød.