Den siste månaden har vi ikkje dei store endringane i arbeidsløysa i Møre og Romsdal, skriv NAV i ei pressemelding.
Justert for vanlege sesongvariasjonar har fylket ein nedgang i arbeidsløysa den siste månaden på 18. Det er ei litt svakare utvikling enn i resten av landet der nedgangen er rundt 1000.
Medan grafen over syner at det har vore ei sterk auke i arbeidsløysa dei siste to åra, er situasjonen altså ikkje dramatisk for april.
Verst i Kristiansund
I vårt fylke er det på Nordmøre det er høgast arbeidsløyse med 3,6 prosent per april. Dette kjem av at Kristiansund åleine har ei arbeidsløyse på 5,5 prosent, høgast blant kommunane i fylket.
Dei andre kommunane på Nordmøre har låg arbeidsløyse, frå 2,7 til 1,5 prosent , seier fylkesdirektør Stein Veland.
Her er tala for heilt ledige i april for kommunanene romsdalregionen:
Kommune | Sum | Prosent | Siste mnd | Siste år |
Molde | 409 | 2,90 % | -16 | 88 |
Ålesund | 862 | 3,40 % | -17 | 136 |
Kristiansund | 708 | 5,50 % | -7 | 277 |
Vestnes | 93 | 2,60 % | -2 | 8 |
Rauma | 155 | 4,00 % | 12 | 84 |
Nesset | 53 | 3,40 % | 2 | 1 |
Midsund | 35 | 3,40 % | 9 | 10 |
Sandøy | 15 | 2,20 % | 2 | 8 |
Aukra | 45 | 2,60 % | -1 | 16 |
Fræna | 182 | 3,50 % | -7 | 29 |
Eide | 54 | 2,90 % | -4 | 7 |
Averøy | 75 | 2,50 % | -8 | 11 |
Gjemnes | 34 | 2,50 % | -5 | 15 |
4610 heilt utan arbeid
I april 2016 er det 4610 personar heilt utan arbeid i Møre og Romsdal. Det utgjer til 3,3 prosent av arbeidsstokken og er ei auke i arbeidsløysa på 35,7 prosent frå same månad i fjor.
I april 2016 har vi 869 arbeidssøkjarar i ulike arbeidsmarknadstiltak, 203 fleire enn i april 2015. Til saman gjev dette ei brutto arbeidsløyse på 5479 personar i fylke.
Arbeidsløysa i Møre og Romsdal er no 2,4 prosent for kvinner og 4,1 prosent for menn.
I landet er det 85.471 heilt arbeidslause. Dette er 3,1 prosent av arbeidsstokken, og ei auke på 7,3 prosent samanlikna med same periode i fjor.