Legg ned Bergensruta

Sviktande belegg gjer at KrohnAir legg ned ruta frå Molde til Bergen og Stavanger.

Foto: Egil H. Torvik

Molde

Krohn Air legg ned ruta frå Molde til Bergen og Stavanger frå 19. november , berre vel to månader etter oppstart 30. august i år.

- Vi legg ned på grunn av sviktande belegg på ruta. Det viser seg at det var færre passasjerar enn vi hadde rekna med på ruta, seier marknadssjef og pilot i Krohn Air, Roy Andre Uren.

Eigar og flyentusiast Claus Krohn er i dag på reise og ikkje sjølv tilgjengeleg for kommentar.

Uren opplyser at alle som har billett på rutene sørover etter 19. november, er kontakta og har fått sin billett refundert eller booka om.

- Kva med flyet?

- Det har eg ingen kommentar til.

- Er det aktuelt å ta opp andre ruter - mange ønskjer seg til dømes direktefly til London?

- Vi har ingen konkrete planar om nye ruter no. Mange har spurt oss om Londonrute, men det er nok uaktuelt. Kostnadene er for store, og trafikkgrunnlaget ikkje godt nok, seier Uren.

Krohn Airs fly til Trondheim vil halde fram som før.

- Trondheimsruta går til godt, og stadig betre, seier Uren.