– Men festivalen 15. til 17. juli er meir enn musikk. Målet er å skape ei triveleg helg for heile familien. Med underhaldning og ulike aktivitetar for alle aldersgrupper. Her er det palleløp, bruskassestabling, sjøaktivitetar og mykje moro, fortel festivalleiinga.
Romsdals Budstikke møter tre av dei som har erfaring i å arrangere festivalen. Dei har vore med på dei fleste av 11 tidlegare festivalar, Lars Jarle Jenset, Frits Inge Godø og Øystein Hagset.
Allsidig
– Midsundfestivalen er allsidig i si form, det blir både kyrkjekonsert og friluftsgudsteneste søndag formiddag på Stølen i Nord-Heggdal. Det skjer i samarbeid med Nord Heggdal Vel og soknerådet, fortel Godø.
– Vi har godt håp om at Geirr Vetti skal kome, mannen som fekk sherpaane til Norge. Han vil fortelje om sitt møte med folket som no bygger sti i Midsundura og er over store delar av landet.
Triatlon
– Triatlon vert det i år også, det er for dei sprekaste. Den startar opp Midsundura til Digergubben og over fjellet til Sør-Heggdal. Deretter på sykkel til Midsund sentrum og rundt Midøya. Før ei avsluttande svømmeetappe i hamnebassenget.
Høgdepunkta
Heile laurdag er det lokale aktørar som tek seg av underhaldninga i sentrum, der kulturskolen står for mykje av innslaga. Dette er som oppvarming til dei store konsertane.
Og her er trekkplastera;
Stage Dolls vart starta i 1983 og er eit av våre beste rockeband. Dei har produsert mange album og turnert landet. Fredag 15. juli er de på hovudscena i Midsund.
Eventyret Dance With a Stranger starta i 1984. Dei hentar sin inspirasjon frå blues og jazz, soul, rock og pop. Responsen der dei opptrer viser at gruppa er like populær. Laurdag 16. juli er de på hovudscena i Midsund.
Det har vore særdeles innhaldsrike år for Trine Rein. Som vinnar av NRKs The Hit 2014, finaleplass i NRKs Stjernekamp 2015 før fjoråret vart avslutta med to juleturnéar og seksti julekonsertar. Søndag 17. juli er ho på plass i Otrøy kyrkje.
Trekker folk
– Det har nesten aldri vore dårleg vêr under festivalen, godvêr skaper trivsel. I fjor samla Hellbillies rundt 1500, fortel Jenset.
– Vi får satse på godt over 500 på fredag, godt over 1000 på laurdag og full kyrkje på søndag. Då er vi fornøgd, seier dei.
Gode bidrag
Midsundfestivalen krev ein stor dugnadsgjeng, kvart år er det meir enn 100 som stiller opp.
– Idrettslaget har ansvaret for å organisere dugnaden, dei har nok kontroll. Av eit bra overskot vert det betalt ut mellom 200.000 og 300.000 kroner til fordeling på lag og organisasjonar som stiller opp, fortel dei. Festivalområdet er lagt til sentrum, med småbåthamn og gjestehamn. Midsund Marina har nyleg opna eit praktbygg i småbåthamna.
Nye tilbod
Som tidlegare år tjuvstartar festivalen med fjellvandring søndag 10. juli. Med start frå sentrum, her er det fritt for å stige opp på toppane Digergubben, Klausethornet, Trollhesten og Midsundhornet.
– Og torsdag og fredag før festivalstart har vi den store fiskerikonferansen der framtidas ressursstyring, ressursutnytting og forvaltning samt eigarskap og rekruttering er sentrale tema. Vi er klar for ei hektisk og innhaldsrik veke i Midsund, fortel Jenset, Godø og Hagset.