Eit fjelleventyr på sykkel

– Målet er å gjere dette til ein populær sykkeltur for norske og utanlandske turistar

Anne Stine Mathisen.

Visst var eg skeptisk. Ein sykkeltur der første etappe skulle gå frå Oppdal til Sunndalsøra!? Skulle vi balansere langs kvitstripa og slåst om plassen med tunge og breie trailerar ned Gråura? Med dagleg leiar Anne Stine Mathisen i Contrast Adventure og vegleiar Geir Plassen hadde andre planar: Til fjells!

BILDER: Se fyldig bildegalleri fra turen her!

Dag 1: Først bygdevegen på sørsida av Driva til Blokkhus. Derfrå på god grusveg oppover til Dindalshytta (Trondheim Turistforening). Vidare innover Dindalen, framleis på brukbar vegstandard, men med ei og anna utfordrande elv som kryssa vegen, til Veggasetra og Veggavatnet. Her fekk vi ein km med sti, men ikkje verre enn at sykkelen kan trillast, ikkje berast. Midt på vatnet kryssar vi fylkesgrensa, og dermed skiftar dalen namn frå Dindalen til Linndalen og elva frå Dindalselva til Linndalselva.

Men landskapet er like stort og vakkert enten du er i Trøndelag eller Møre og Romsdal. På god fjellveg sykla vi vidare til Gammelsetra (Kristiansund og Nordmøre Turistforening), og derfrå nedover til Jenstad med strålande utsyn mot Svisdal og Jenstadjuvet (Åmotan) med kvitskummande fossar. Nye unnabakkar tok oss leikande lett ned til Gjøra, der vi tok ein stopp på Nasjonalparksenteret. Resten av dag ein er Sunndalen ned til Sunndalsøra. Små stubbar med gamlevegen og til slutt sykkelveg gjorde også den etappen til ei fin sykkeloppleving. Vi overnatta og fekk nyte god mat, gode historier og strålande utsyn rett opp på Hårstadnebba hos innehavar Jostein Trædal og dagleg leiar Astrid Mølsæter på Trædal hotell og turistsenter.

Dag 2: Aursjøvegen mellom Sunndalsøra og Eikesdal er vel kjent som ein av Norges finaste fjellvegar. Tunge motbakkar opp frå Litledalen til Aursjøen, men ein festdag av ein sykkeltur gjennom eit stort og variert fjellandskap. Vi avslutta med den idylliske gamlevegen i Eikesdal og eit herleg cruise med god mat over Eikesdalsvatnet med «Mardøla» og Nikolai Finset som vert. Overnatting i hytter med høg standard hos Anna Margrete og Jostein Øverås i Eresfjord, og god frukost i regi av Olise Øverås og Bjørn Cameron Alexander, som frå neste år skal drive Kavli Moen Gård i Eresfjord.

Dag 3: Siste etappe frå Eresfjord til Åndalsnes startar med 500 høgdemeter opp til Vistdalsheia, men resten er lett sykling på veg. Ein del vegtrafikk mellom Åfarnes og krysset der fjellvegen går opp til Skorgedalen. Vidare gamlevegen til Isfjorden og sykkelveg til Åndalsnes.

Les flere kortreist-reportasjer her!

Contrast Adventure har ambisjonar om å gjere denne sykkelturen til eit stort reiselivsprodukt.

– Målet er å gjere dette til ein populær sykkeltur for norske og utanlandske turistar, seier dagleg leiar Anne Stine Mathisen.

Eg trur ho vil lykkast. Garantert!